tissue culture arecanut ಅಂಗಾಂಶ ಕಸಿ ಅಡಿಕೆ ಸಸಿಗಳು

ಅಡಿಕೆಗೆ ಎದುರಾಗುವ ಹಳದಿ ಎಲೆ ರೋಗ ನಿರೋಧಕ ಅಂಗಾಂಶ ಕಸಿ ತಳಿ: 

ಕಾಸರಗೋಡಿನ ಸಿಪಿಸಿಆರ್‌ಐಯಲ್ಲಿ ಅಡಿಕೆ ಎಲೆ ಹಳದಿ ರೋಗ ನಿರೋಧಕ ಗುಣವುಳ್ಳ ಅಂಗಾಂಶ ಕಸಿ ತಳಿ ಅಭಿವೃದ್ಧಿ ನಡೆಯುತ್ತಿದ್ದು, ಸಧ್ಯ ಗಿಡದ ಒಂದು ಹಂತ ಪೂರ್ಣವಾಗಿದೆ.

ಸುಮಾರು ಎರಡು ವರ್ಷಗಳ ಹಿಂದೆ ಕಾಸರ ಗೋಡು ಸಿಪಿಸಿಆರ್‌ಐ ವಿಜ್ಞಾನಿ ಗಳು ಅಡಿಕೆ ಎಲೆ ಹಳದಿ ರೋಗ ಬಾಧಿತವಾಗಿರುವ ಪ್ರದೇಶಗಳಲ್ಲಿ ಉಳಿದಿರುವ ಬೆರಳೆಣಿಕೆಯ ಕೆಲವು ಆರೋಗ್ಯಯುತ ಅಡಿಕೆ ಮರಗಳಿಂದ ಎಳೆ ಹಿಂಗಾರ ಸಂಗ್ರಹಿಸಿ ಅಡಿಕೆ ಹಳದಿ ಎಲೆ ರೋಗ ನಿರೋಧಕ ಗುಣವುಳ್ಳ ಅಂಗಾಂಶ ಕಸಿ ತಳಿ ಅಭಿವೃದ್ಧಿ ಮಾಡುವ ಪ್ರಯತ್ನ ಆರಂಭಿಸಿದ್ದರು. ಈದೀಗ ಅಭಿವೃದ್ಧಿ ಪಡಿಸಿದ ತಳಿ ಪ್ರಯೋಗಾಲಯದಲ್ಲಿ ಬೆಳೆಯುತ್ತಿದ್ದು, ಯಶಸ್ಸಿನ ನಿರೀಕ್ಷೆ ಮೂಡಿಸಿದೆ.

ಅಡಿಕೆಗೆ ಎದುರಾಗುವ ಹಳದಿ ಎಲೆ ರೋಗ ನಿರೋಧಕ ಗುಣವುಳ್ಳ ತಳಿ ಅಭಿವೃದ್ಧಿಯ ವಿಧಾನದ ಬಗ್ಗೆ ಎರಡು ವರ್ಷಗಳಿಂದ ಸಿಪಿಸಿಆರ್‌ಐ ವಿಜ್ಞಾನಿಗಳ ತಂಡ ಪ್ರಯತ್ನ ನಡೆಸುತ್ತಲೇ ಇತ್ತು. ಅಂಗಾಂಶ ಕಸಿಗಾಗಿ ಸಂಪಾಜೆ, ಅರಂತೋಡು, ಚೆಂಬು ಹಾಗೂ ಶೃಂಗೇರಿಗಳಿಂದ ಆರೋಗ್ಯಯುತ ಮರಗಳ ಎಳೆ ಹಿಂಗಾರವನ್ನು ಸಂಗ್ರಹಿಸಿದ್ದರು, ನಂತರ ಇದನ್ನು ಅಂಗಾಂಶ ಕಸಿ ವಿಧಾನದಲ್ಲಿ ಅಭಿವೃದ್ಧಿಪಡಿಸುತ್ತಿದ್ದರು.

ಇದುವರೆಗೆ ಅಂಗಾಂಶ ಕಸಿ ಮಾಡುವ ವಿಧಾನ ಅಡಿಕೆ ಮತ್ತು ತೆಂಗಿನಲ್ಲಿ ಪರಿಣಾಮಕಾರಿಯಾಗಿ ಸಾಧ್ಯವಾಗಿರಲಿಲ್ಲ. ಆದರೆ ಈಗ ಸಿಪಿಸಿಆರ್‌ಐ ವಿಜ್ಞಾನಿಗಳು ಯಶಸ್ಸಿನ ನಿರೀಕ್ಷೆಯಲ್ಲಿದ್ದಾರೆ, ತೀರಾ ನಿಧಾನವಾದ ಮತ್ತು ಸೂಕ್ಷ್ಮವಾದ ಕಾರ್ಯ ಇದಾಗಿದ್ದು, ವಿಜ್ಞಾನಿಗಳ ತಂಡ ಬಹಳ ಎಚ್ಚರಿಕೆಯಿಂದ ಕೆಲಸ ಮಾಡುತ್ತಿದೆ. ಇದು ಗಿಡವಾಗಿ ರೂಪುಗೊಳ್ಳಲು ಇನ್ನೂ ಕನಿಷ್ಠ ಎರಡು ವರ್ಷಗಳ ಕಾಲ ಬೇಕಾಗುತ್ತದೆ.

ಅಂಗಾಂಶ  tissue culture arecanut ಕಸಿ ವಿಧಾನದಲ್ಲಿ ಈಗಾಗಲೇ ಗಿಡದ ಒಂದು ಹಂತ ಸಿದ್ಧವಾಗಿದ್ದು, ಗಿಡ ಇನ್ನಷ್ಟೇ ಬೇರು ಹಾಗೂ ಎಲೆಗಳ ಹಂತಕ್ಕೆ ಬೆಳೆಯಬೇಕಿದೆ. ಪ್ರತೀ ಹಂತದಲ್ಲೂ ತುಂಬಾ ಎಚ್ಚರಿಕೆ ಹಾಗೂ ಆರೈಕೆಯ ಅಗತ್ಯವಿರುವುದರಿಂದ ಇಡೀ ಪ್ರಕ್ರಿಯೆ ನಿಧಾನವಾಗಿ ನಡೆಯುತ್ತಿದೆ. 

ಅಂಗಾಂಶ ಕಸಿ ವಿಧಾನದಲ್ಲಿ ಎಲ್ಲ ಮರಗಳ ಹಿಂಗಾರವೂ ಒಂದೇ ವೇಗದಲ್ಲಿ ಬೆಳೆಯಲು ಸಾಧ್ಯವಿಲ್ಲದ ಕಾರಣ ಸಾಕಷ್ಟು ಮಾದರಿಗಳ ಅಗತ್ಯವಿರುತ್ತದೆ. ಎರಡು ವರ್ಷಗಳ ನಂತರ ಗಿಡ ತಯಾರಾದರೂ ಅದರ ಬೆಳವಣಿಗೆ ಮತ್ತು ಅಧ್ಯಯನದ ನಂತರವಷ್ಟೇ ಕೃಷಿಕರಿಗೆ ಲಭ್ಯವಾಗಲು ಸಾಧ್ಯವಿದೆ ಎಂದು ಸಿಪಿಸಿಆರ್‌ಐ ವಿಜ್ಞಾನಿಗಳು ಮಾಹಿತಿ ನೀಡಿದ್ದಾರೆ.